Texas Rangers (bofbalspan)

Die Texas Rangers is 'n Amerikaanse professionle bofbalspan wat gebaseer is in die Dallas–Fort Worth metropolitaanse gebied. Die Rangers ding mee in Hoofligabofbal (MLB) as 'n lid van die Amerikaanse Liga (AL) se Westelike Divisie (AL-Wes). Die span is een van twee hoofligaklubs wat gebaseer is in Texas, saam met die Houston Astros van dieselfde liga. Die span is in 1961 gestig as die Washington Senators (1960-1971), 'n uitbreidingspan wat toegeken is aan Washington, D.C., nadat die vorige span, ook bekend as die Washington Senators (1901–1960), na Minnesota verhuis het en die Minnesota Twins geword het. Die nuwe Senators-span het na die 1971-seisoen na Arlington, Texas verhuis en gedebuteer as die Rangers in die opvolgende lente. In 2020 het die Rangers verskuif na die nuwe Globe Life Field-stadion, nadat hulle van 1994 tot 2019 hul tuiswedstryde gespeel het by Globe Life Park, (nou Choctaw-stadion). Die span se naam is afkomstig van 'n historiese wetstoepassingsagentskap (die Texas Ranger Division).^[1] Die span se kleure is blou, rooi en wit^[2][3]

Die Rangers het nege verskynings in Hoofligabofbal se na-seisoen gemaak, met sewe verskynings wat gevolg het op divisiekampioenskapstitels in 1996, 1998, 1999, 2010, 2011, 2015 en 2016, en in 2012 en 2023 as 'n "wild card"-span. Voor 2010 was die Rangers die enigste span in Hoofligabofbal wat nog nooit verby die eerste rondte van die uitspeelrondes gevorder het nie. In 2010 het die Rangers vir die eerste keer verby die divisiereeks gevorder en die Tampa Bay Rays afgeransel. Die span het hierna hul eerste Amerikaanse Liga-wimpel gewen nadat hulle die New York Yankees in ses wedstryde geklop het; die Liga se mees-waardevolle-speler (Engels: "most valuable player", of afgekort, MVP), Josh Hamilton, het die Rangers se eerste Amerikaanse Liga Kampioenskapsreeks ("American League Championship Series, of afgekort, ALCS) mees-waardevolle-speler-toekenning gewen. Die Rangers het in hul eerste verskyning in 'n Wêreldreeks in vyf wedstryde teen die San Francisco Giants verloor. Die volgende jaar was die span weer Amerikaanse Liga-kampioene, maar het hulle die 2011-Wêreldreeks in sewe wedstryde verloor teen die St. Louis Cardinals. Die Rangers het in 2023 deurgedring na die Wêreldreeks en hul eerste kampioenskap gewen deur die Arizona Diamondbacks in vyf wedstryde te verslaan, met Corey Seager wat die eerste Ranger-speler geword het wat die Wêreldreeks se mees-waardevolle-speler-toekenning gewen het.

Van 1961, met inbegrip van die 2023-seisoen, is die Rangers se algehele rekord 4,740 wedstryde gewen, 5,218 wedstryde verloor en 6 wedstryde gelykop gespeel ('n wenpersentasie van .476). Sedert die span se skuif na Texas in 1972 is hul rekord 4,000 wedstryde gewen, 4,186 wedstryde verloor en 5 wedstryde gelykop gespeel ('n wenpersentasie van .489), met inbegrip van die 2023-seisoen.^[4]

1. ↑ Sullivan, T.R. (1 Desember 2021). "How they came to be called the Rangers". TexasRangers.com]]. MLB Advanced Media. Besoek op 1 November 2023.
2. ↑ Landry, Kennedi (24 Oktober 2023). "Rangers boot Astros in Game 7 to reach 1st World Series since '11". TexasRangers.com. MLB Advanced Media. Besoek op 7 November 2023. Rangers first baseman Nathaniel Lowe sprinted from the stage in center field, carrying a large flag adorned with a "Texas Rangers: American League Champions" logo. He waved the flag in front of hundreds (thousands?) of fans wearing red, white and blue at Minute Maid Park, before disappearing into the clubhouse.
3. ↑ "Uniforms and Logos". TexasRangers.com. MLB Advanced Media. Geargiveer vanaf die oorspronklike op 2 Januarie 2021. Besoek op 17 April 2018.
4. ↑ "Texas Rangers Team Record & Encyclopedia". Baseball–Reference. Sports Reference. Geargiveer vanaf die oorspronklike op 6 April 2011. Besoek op 28 September 2020.